ნაციონალურ საკალათბურთო ასოციაციაში წარმატებული დღე ჰქონდათ ქართველ კალათბურთელებს. სანდრო მამუკელაშვილის „ტორონტო რეპტორსმა“ „დალას მავერიქსს“ უმასპინძლა და 122:96 გაიმარჯვა. გოგა ბითაძის „ორლანდო მეჯიქმა“ „მილუოკი ბაქსთან“ კიდევ უფრო დიდი სხვაობით მოიგო – 130:91.
მამუკელაშვილმა მატჩი სათადარიგოთა სკამიდან დაიწყო, თუმცა საკმარისად შედეგიანი იყო: 18 წუთში 13 ქულა, 7 მოხსნა, 3 პასი, თითო ჩაჭრა-დაფარება.
ბითაძეს შედარებით მცირე სათამაშო დრო ერგო, თუმცა უქმად არ დაუკარგავს: 8 წუთი, 7 ქულა, 5 მოხსნა, 2 პასი.
აღმოსავლეთი კონფერენციის სატურნირო ცხრილში ქართველების გუნდები ერთმანეთის მეზობლად არიან: „ტორონტო“ მეხუთეა (36 მოგება, 27 წაგება), „ორლანდო“ – მეექვსე (35/28).
მამუს გუნდი მომდევნო მატჩს 11 მარტს ჰიუსტონში „როკეტსთან“ გამართავს, ხოლო ბითაძის გუნდი 12 მარტს „კლივლენდს“ მიიღებს.
